A D.O. Monterrei presente no I Salón dos Viños e Augardentes de Galicia en Ámsterdam
Os viños de Monterrei estarán presentes en I Salón dos Viños e Augardentes de Galicia, que terá lugar o 09 de novembro en Ámsterdam.
Monterrei formará parte desta acción de promoción conxunta, organizada pola Unión Española de Catadores (UEC) e a Asociación de Consellos Reguladores do Viño de Galicia e das II.XX. Augardentes e Licores Tradicionais de Galicia (ACRUAGA). A mesma celebrarase no Van der Valk Hotel da cidade, e trátase da terceira acción conxunta efectuada polos Consellos Reguladores de viños e destilados galegos, tras as de París e Londres.
No espazo de Monterrei, os/as participantes poderán degustar viños das seguintes adegas rexistradas na denominación: Trasdovento, Abeledos, Ladairo, Pazo de Valdeconde, Tabú, Alba Al-Bar (Daniel Fernández), Crego e Monaguillo, Fausto Rivero Pardo (Quinta Soutullo), Fragas do Lecer, Franco Basalo, Gargalo, Manuel Guerra Justo (Vía Arxéntea), Manuel Regueiro García, Manuel Vázquez Losada, Pazo Blanco Núñez (Tapias Mariñán), Terras do Cigarrón e Triay Adegas de Oímbra.
Ademais, recibirán información sobre o territorio, historia e tradición vitícola, características edafoclimáticas, variedades de uva ou tipoloxía de viños, entre outras cuestións.
