Os viños de Monterrei estarán presentes en ‘Galicia Wines and Augardentes Festival’, que terá lugar o 11 de xuño en Copenhague.
Monterrei formará parte desta acción de promoción conxunta, organizada pola Unión Española de Catadores (UEC) e a Asociación de CC.RR. Vitivinícolas Galegos e das II.GG. Augardentes e Licores Tradicionais de Galicia (ACRUAGA). A mesma celebrarase en Trio Restaurant (Axel Towers, Jernbanegade 11), e trátase da primeira acción conxunta efectuada polos Consellos Reguladores de viños e destilados galegos no 2025.
No espazo de Monterrei, os/as participantes poderán descubrir os viños das seguintes adegas rexistradas na denominación: Minius, Alejandro Ramón Blanco Dijkhoff (Ramón Bigotes), Pazo de Valdeconde, Tabú, Alba Al-Bar (Daniel Fernández), Vía Arxéntea, Fragas do Lecer, José Antonio Da Silva Pereira (Vinos Lara), Manuel Regueiro García (Serra de Alén), Manuel Vázquez Losada, Pazo Blanco Núñez (Tapias Mariñán), Triay, Ladairo e Franco Basalo.
Ademais, recibirán información sobre o territorio, historia e tradición vitivinícola, características edafoclimáticas, variedades de uva ou tipoloxía de viños, entre outras cuestións.
