A Denominación de Orixe Monterrei concluíu a súa participación en ‘Experiencia Verema Barcelona’ cun éxito de asistencia de público ao espazo da mesma.
Ao longo da xornada, máis dun centenar de asistentes achegáronse ata a área de Monterrei para descubrir as tipoloxías de viños, características edafoclimáticas, variedades de uva, historia e patrimonio vitivinícola; ademais de poder degustar os tintos e brancos das seguintes adegas da denominación: Ladairo, Pazos del Rey, Gargalo, José Antonio Da Silva Pereira (Vinos Lara), Quinta do Buble, Terras do Cigarrón, Pazo Blanco Núñez (Tapias Mariñán), Fragas do Lecer, Manuel Guerra Justo, Tabú, Franco Basalo, Alba Al-Bar (Daniel Fernández), Trasdovento, José Luis Gómez Ibáñez (Valderello), Crego e Monaguillo, Fausto Rivero Pardo (Quinta Soutullo), Pazo de Valdeconde, Castro de Lobarzán, Manuel Vázquez Losada, Terrae Monterrei (Adegas Terrae) e Triay Adegas de Oímbra.
Entre os asistentes ao espazo de Monterrei atopábanse representantes do sector hostaleiro e de restauración, catadoras, docentes e alumnado de escolas de hostalería, ademais de socios de Verema.
É a primeira ocasión que a D.O. Monterrei forma parte das ‘Experiencias Verema’, “e nas que agardamos seguir participando nun futuro non moi afastado”, indica a presidenta do C. R.D.O. Monterrei, Lara Da Silva. “A realización e participación en eventos destas características constitúe un escaparate crave para mostrar os nosos viños a un amplo espectro de público, desde sector de hostería e restauración, distribución, importación….ata o consumidor final”, resalta Dá Silva, “polo que sempre tratamos de desenvolver accións destas características que nos permite falar de ti a ti co noso público”.
