Os viños da D.O. Monterrei viaxan a Lugo
O luns 17 de xullo, os brancos e tintos de Monterrei desprazaranse ata Lugo para formar parte dun Túnel do Viño da denominación.
A sala de exposicións do Pazo de San Marcos acollerá, entre as 17 e 21 horas, a profesionais do sector da hostalería e restauración, distribuidores, sumilleres, medios de comunicación e alumnos de escolas de hostalería que se achegarán ata alí para coñecer as peculiaridades dos viños de Monterrei (historia vitivinícola, características edafoclimáticas, variedades de uva ou tipoloxías de viño, entre outras).
Nesta ocasión as adegas que formarán parte desta iniciativa son: Ladairo, Gargalo, Castro de Lobarzán, José Luis Gómez Ibáñez (Valderello), José Antonio Da Silva Pereira (Vinos Lara), Crego e Monaguillo, Terras do Cigarrón, Triay, Terrae Monterrei, Pazo Blanco Núñez (Tapias Mariñán), Fragas do Lecer, Manuel Guerra Justo (Vía Arxéntea), Pazo de Valdeconde, Tabú, Alba Al-Bar (Daniel Fernández), Franco Basalo, Trasdovento, Manuel Vázquez Losada e Manuel Regueiro García (Serra de Alén).
“Este Túnel continúa o programa de iniciativas promocionais da D.O. Monterrei para este o 2023”, destaca o presidente, Jonatás Gago García, “que permitiu achegar os nosos tintos e brancos a diversas cidades do país, como Madrid ou Santander”.
