A D.O. Monterrei recibe no seu territorio importadores e compradores dos Países Baixos e Irlanda a través dunha misión inversa

A iniciativa, desenvolvida os días 3, 4 e 5 de novembro, permitiu a profesionais internacionais coñecer de primeira man o territorio, a diversidade e a calidade dos viños de Monterrei.

A Denominación de Orixe Monterrei acolleu unha misión inversa de importadores e compradores procedentes dos Países Baixos e Irlanda, unha iniciativa promocional destinada a dar a coñecer o potencial vitivinícola de Monterrei e favorecer novas oportunidades comerciais nos mercados internacionais.

Durante a súa estadía no territorio, os profesionais visitantes tiveron a oportunidade de realizar unha cata de 24 referencias de viños da denominación de orixe (13 brancos e 11 tintos). Unha selección que lles permitiu coñecer a diversidade de elaboracións, variedades de uva e perfís enolóxicos que caracterizan os viños de Monterrei.

Así mesmo, o programa incluíu visitas profesionais a sete adegas inscritas na D.O. Monterrei: Abeledos, Gargalo, Tapias Mariñán, Terras do Cigarrón, Castro de Lobarzán, Triay e Manuel Vázquez Losada. En cada unha delas, os importadores e compradores puideron coñecer as súas instalacións, os seus proxectos vitivinícolas e a súa filosofía de elaboración, ademais de catar diferentes referencias dos viños que elaboran.

A misión inversa enmárcase na estratexia de promoción e apertura a novos mercados da Denominación de Orixe Monterrei, que continúa traballando para incrementar a presenza e o recoñecemento dos seus viños fóra de España, xerando contactos directos entre as adegas e os profesionais do sector da distribución e da importación.

O presidente da D.O. Monterrei, Manuel Vázquez, destaca a importancia deste tipo de iniciativas para o futuro do sector: «As misións inversas de importadores representan unha oportunidade moi interesante para achegar os nosos viños a profesionais de mercados estratéxicos. Permiten que estes profesionais coñezan directamente o noso territorio, visiten as adegas, descubran os seus proxectos e comproben a calidade e diversidade dos nosos viños. O contacto directo é fundamental para xerar confianza e establecer posibles relacións comerciais que contribúan a seguir posicionando Monterrei no exterior».

Con esta iniciativa, a D.O. Monterrei reforza a súa aposta pola internacionalización, a promoción das súas adegas e a consolidación de novas canles comerciais, poñendo en valor a calidade, personalidade e singularidade dos seus viños ante compradores de mercados europeos.