Monterrei, a primeira denominación de orixe vitivinícola galega cun décimo de Lotería Nacional
A primeira denominación de orixe vitivinícola galega que contará cun décimo de Lotería Nacional será a de Monterrei. Así o confirmou Loterías y Apuestas del Estado (SELAE) ao Consello Regulador, tras a petición formulada desde a entidade.
Así o décimo do Sorteo do próximo 22 de xuño estará dedicado á Denominación de Orixe Monterrei. “Trátase dunha excelente noticia para a denominación, na que levamos traballando desde Presidencia desde fai máis de tres anos”, destaca Lara Da Silva Rodríguez.
O xerme desta boa nova sitúase o 13 de maio de 2019, cando tivo lugar a Tertulia Vinícola del Real Casino de Madrid titulada “Sumillería, conmemoración de 2 siglos de historia”. Esta efeméride foi conmemorada coa emisión doutro décimo de Lotería Nacional (a iniciativa de Carlos Mateu, fundador e director de catadelvino.com). Despois dese evento, da man de Eliseo González (Real Casino de Madrid), Luis Paadín (sumiller) e Lara Da Silva, solicitouse a SELAE a inclusión nos décimos dun dos Sorteos de Lotería Nacional da imaxe da D.O. Monterrei, co obxecto de apoiar a cultura do viño, pola súa importancia histórica, cultural, social e económica no país.
“A nosa denominación será unha das primeiras de España, e a primeira galega, á que se lle dedique un décimo de Lotería Nacional ”, traslada a presidenta, “o que permitirá poñer de relevo a importancia do sector agrario, e sobre todo a vitivinícola, e isto é importantísimo tendo en conta a defenestración que as algunhas políticas europeas están a facer do viño en cuestión. Moita parte do sector non é coñecedor diso, por iso cuestións como estas son importantes para reforzar a idea do viño como un alimento, e seña de identidade económica e histórica do noso país. Ademais a nós serviranos para no mapa enolóxico nacional e consolidar a imaxe de marca de Monterrei”, manifesta. “Creo que o feito de que o selo de calidade de Monterrei, é dicir o distintivo da nosa etiqueta, vaia a saír estampado nunha tirada dun décimo de Lotería a nivel nacional é unha excelente noticia precisamente para dar a coñecer a nosa imaxe de marca conxunta e que, como apuntaba hai uns días, aproveitemos esta nova oportunidade para asentar a marca de forma atemporal, máis aló de modas, como pode ser a Godello. Por iso non podo estar máis que agradecida a todos os que me axudaron neste camiño, para que isto vaia se é posible neste 2023”, conclúe a presidenta.
