A Ruta do Viño Monterrei, coa colaboración de Turismo de Galicia, organizará entre os días 29 e 31 de outubro a décima edición das Xornadas de Portas Abertas.
Nas mesmas, que conta tamén co apoio dos municipios de Monterrei, Oímbra e Verín, participarán seis adegas desta denominación de orixe que ofertarán visitas guiadas polas súas instalacións acompañadas dunha degustación de viño de Monterrei. As adegas participantes na iniciativa son: Daniel Fernández, Fragas do Lecer, Gargalo, Ladairo, Pazo de Valdeconde e Triay. O horario de visita será o sábado de 11.30, 13 e 17 horas e o domingo ás 12 horas (recoméndase confirmar a visita previamente coa adega).
Tamén formarán parte desta xornada o restaurante Parador de Verín-Monterrei, que ofrecerá un menú especial regado con viños da D.O. Monterrei cun prezo que oscila entre os 25 e 30 euros. Ademais, realizaranse ofertas especiais nos establecementos: O Retiro do Conde, Hotel Villa de Verín e Parador de Verín-Monterrei. As reservas xestiónanse directamente cos establecementos, especificando que se trata da oferta de Xornadas de Portas Abertas.
As décimas Xornadas de Portas Abertas da Ruta do Viño de Monterrei, ademais das visitas guiadas e degustacións en adegas, tamén inclúen as seguintes actividades:
– Harmonía de Viños de Monterrei e Conservas de Galicia (Venres 29, ás 20.00 horas, no Antigo Hospital de Peregrinos -Castelo de Monterrei-). Realización dun obradoiro gastronómico gratuíto, no que os participantes probarán conservas galegas en combinación con distintas elaboracións de viño da D.O. Monterrei. Requírese inscrición previa: Ruta do Viño Monterrei (Rúa Castelao, 10 baixo // 988 590 007 // info@domonterrei.com).
– ‘A vida dos meus avós’ (Venres 29, ás 16.00 horas). Realización de actividades destinadas ao público infantil, que coñecerá diferentes espazos nos que a historia e viticultura de Monterrei serán as protagonistas. Para participar nesta iniciativa, de carácter gratuíto, requírese inscrición previa: Ruta do Viño Monterrei (Rúa Castelao, 10 baixo // 988 590 007 // info@domonterrei.com).
– Túnel do Viño (Domingo 31, ás 13.00 horas, no Museo Claustro Mercedario de Verín). Actividade gratuíta organizada polo Ruta do Viño Monterrei na que participan as adegas da entidade. Requírese inscrición previa: Ruta do Viño Monterrei (Rúa Castelao, 10 baixo // 988 590 007 // info@domonterrei.com).
– Ruta de Sendeirismo polos Lagares Rupestres de Oímbra (Domingo 31, ás 09.00 horas). Ruta polos Lagares Rupestres de Oímbra (entre 3 e 5 quilómetros). Recoméndase calzado cómodo. Requírese inscrición previa: Ruta do Viño Monterrei (Rúa Castelao, 10 baixo // 988 590 007 // info@domonterrei.com).
– Visita ao Castelo de Monterrei. A Oficina de Turismo de Monterrei organiza visitas gratuítas a unha das fortalezas mellor conservadas de Galicia, declarada Monumento Nacional. O conxunto arquitectónico está conformado polo Pazo das Damas, o Hospital de Peregrinos, a torre da Homenaxe e a igrexa de Santa María de Monterrei (Venres 29, sábado 30 e domingo 31: visita guiada: ás 11 e 16 horas). Máis información: Oficina de Turismo de Monterrei (Paseo das Damas s/n – Monterrei // 988 361 360 // turismomonterrei@gmail.com // turismo@monterrei.gal).
– Sala de Exposicións Hospital da Trinidade (Venres 29, sábado 30 e domingo 31 de outubro, de 10.30 a 14.00 horas, e de 15.00 a 19.00 horas). Sala de actividades culturais situada no Hospital dá Trinidade no Castelo de Monterrei. Máis información: Oficina de Turismo de Monterrei (Paseo das Damas s/n – Monterrei // 988 361 360 // turismomonterrei@gmail.com // turismo@monterrei.gal).
– Busca do Tesouro en Monterrei (Venres 29 ás 17.00 horas, sábado 30 e domingo 31 ás 12.00 e 17.00 horas). Prezo: 15 euros/ familia (ata 6 participantes). Necesaria reserva previa. Máis información: Oficina de Turismo de Monterrei (Paseo das Damas s/n – Monterrei // 988 361 360 // turismomonterrei@gmail.com // turismo@monterrei.gal).
– Visita Museo Claustro Mercedario (Venres 29 e sábado 30, de 11.00 a 14.00 e de 17.00 a 20.00 horas; e Domingo 31 de 11 a 14 horas). Un museo para a divulgación do patrimonio comarcal situado no emblemático claustro da Igrexa da Mercé. Unha mostra expositiva permanente permite ao visitante penetrarse na cultura vinícola deste territorio, visitar unha lareira ou lembrar como era a vida nas casas galegas. Xunto con reproducións de esculturas como a de Dionisos e Ampelos ou a Pedra Alta, unida ás orixes da Vía da Prata, este espazo convértese en visita obrigada na vila de Verín. Máximo 20 persoas por grupo. Máis información Museo Claustro Mercedario de Verín (museodeverin@gmail.com // 617 963 905).
– Exposición ‘O viño nos Camiños de Santiago’ (Venres 29 e Sábado 30, de 11.00 a 14.00 e de 17.00 a 20.00 horas; e Domingo 31 de 11 a 14 horas). Exposición temporal situada no Museo Claustro Mercedario, que realiza un percorrido polas diferentes pegadas que a cultura do viño deixou na súa interacción coas diferentes rutas do Camiño de Santiago. Máximo 20 persoas por grupo. Máis información Museo Claustro Mercedario de Verín (museodeverin@gmail.com // 617 963 905)
– Ruta dos Lagares Rupestres. Visita a adega – Lagar As Barrocas. Ruta de sendeirismo sinalizada polos lagares rupestres do municipio de Oímbra (pode realizarse de modo libre e individual, facilitan mapas informativos no Concello de Oímbra) e visita á adega – Lagar As Barrocas . Máis información en: Concello de Oímbra (Avda do Carregal, 3 – Oímbra // 988 426 160 // concello@oimbra.gal
– Oficina de Turismo de Verín (Venres de 09.30 a 14.30 e de 16.30 a 19.00 horas, na Oficina de Turismo de Verín). Punto de información turística e sala de exposicións. Máis información en: Oficina de Turismo de Verín ( R/ Irmáns La Salle s/n -Verín // 988 411 614 // turismo@verin.gal).
Doutra banda, tamén se contará co Bus do Viño. Un servizo que terá un custo do mesmo xeito que nos restantes rutas do viño de Galicia, que é de 10 euros/adulto e de 5 para nenos/ as (de 3 a 13 anos). Este servizo contará con catro rutas na xornada do sábado 30 de outubro, con saídas desde A Coruña-Santiago de Compostela, Vigo, Ourense-Xinzo de Limia e Lugo-Verín. Toda a información de horarios e lugares de visita e recollida na Ruta do Viño Monterrei (Rúa Castelao, 10 baixo – Verín // 988 590 007 // info@domonterrei.com).
O crecente interese pola cultura do viño supón unha boa oportunidade para que todo o mundo poida coñecer as adegas de Monterrei e a elaboración dos seus viños. A Ruta do Viño Monterrei atópase situada no sueste da provincia de Ourense, lindando coa fronteira de Portugal. Os seus viñedos aparecen estruturados en dúas subzonas perfectamente delimitadas pola súa orografía: o val de Monterrei e a ladeira de Monterrei. Nesta comarca atoparemos adegas que coroan espectaculares miradoiros na montaña e outras aos pés do val.
