O C.R.D.O. Monterrei e Expourense selan unha década de cooperación

O C.R.D.O. Monterrei e Expourense cumpren unha década de cooperación e promoción mutua. Ambas as entidades ratificaron por décimo ano consecutivo a súa condición de colaboradores, o que lle permite ao Consello Regulador de Monterrei estar presente en todas as accións promocionais, feiras e eventos organizados polo recinto para este ano 2025. A firma deste convenio, que tivo lugar esta mañá na sede do Consello Regulador situada en Verín, foi efectuada por parte do presidente do C.R.D.O. Monterrei, Manuel Vázquez Losada, e do director xerente da Fundación Expourense, Rogelio Martínez. A D.O. Monterrei é entidade colaboradora da Fundación desde o ano 2015 e isto conleva a participación de Monterrei nas distintas accións promocionais que Expourense realiza ao longo do ano, sobre todo en Portugal, a favor dos distintos convenios de cooperación transfronteiriza que a Fundación mantén con distintas entidades da Eurorrexión.

A primeira destas citas promocionais será a feira AGRO de Braga que celebra a súa 57ª edición do 3 ao 6 de abril e na que Expourense sempre participa con stand propio grazas á colaboración con Forum Braga. Dentro das feiras do calendario previsto para 2025, Monterrei contará con stand propio na 11ª edición de Ourense Vinis Terrae, Salón do Viño e Licores Galegos de Calidade, que se celebra os días 2 e 3 de xuño. E tamén participará de forma directa en Xantar, o 26º Salón Internacional de Turismo Gastronómico, que terá lugar entre o 20 e 23 de novembro. Este Consello Regulador participará no Túnel do Viño, unha área na que se presenta aos visitantes a calidade e as variedades autóctonas galegas. Ademais, os viños de Monterrei maridarán os pratos elaborados con produtos de calidade de Galicia, dentro dos showcookings de Xantar, e organizarán unha cata comentada.

Ademais desta presenza directa, a promoción dos viños de Monterrei está presente en todas as feiras e eventos deportivos do calendario de Expourense a través da proxección de vídeos corporativos na pantalla xigante do pavillón do recinto. Coa firma do convenio, ambos os organismos tamén poderán desenvolver misións comerciais que teñan como obxectivo a promoción dos viños e a enogastronomía en xeral, tanto en territorio nacional como no estranxeiro.

Rogelio Martínez agradeceu ao Consello Regulador a súa fidelidade como colaborador fixo de Expourense e lembrou que a firma deste convenio demostra como as entidades da provincia de Ourense confían no recinto feiral para dar a coñecer os seus produtos e servizos neste espazo de cooperación público-privada que recibe cada ano máis de 120.000 visitas.

Pola súa banda, Manuel Vázquez resaltou que Expourense é un bo escaparate para potenciar a imaxe de marca da D.O. Monterrei, e dar a coñecer os viños que se elaboran no territorio tanto no mercado nacional como no internacional.